एनपिएल फाइनलमा खेलाडीमा हौसला थप्न मुख्यमन्त्री आचार्य टियु मैदानमा
काठमाडौं २७ मङ्सिर । लुम्बिनी प्रदेशका मुख्यमन्त्री चेतनारायण आचार्य एनपिएलको फाइनल खेलमा सहभागी खेलाडीलाई उत्साह दिन त्रिवि क्रिकेट मैदान पुग्नुभएको छ । उहाँसँगै भौतिक पूर्वाधार विकास मन्त्री भूमिश्वर ढकाल पनि उपस्थित हुनुहुन्छ ।
नेपाल क्रिकेट संघ क्यानका अध्यक्ष चतुरबहादुर चन्दले मुख्यमन्त्री आचार्य र मन्त्री ढकाललाई मैदानमा स्वागत गर्नुभयो ।
नेपाली क्रिकेटको सबैभन्दा ठूलो प्रतियोगिता एनपिएलको फाइनल अहिले चलिरहेको छ । उपाधिका लागि लुम्बिनी लायन्स र सुदूरपश्चिम रोयल्स आमनेसामने भएका छन् ।
मुख्यमन्त्री आचार्यले क्रिकेटप्रतिको बढ्दो आकर्षण नेपालको खेल क्षेत्रका लागि सकारात्मक संकेत भएको बताउनुभयो । उहाँले यस्ता प्रतियोगिताले खेल पर्यटनको माध्यमबाट आर्थिक समृद्धिमा योगदान पुर्याउने र नेपाललाई अन्तर्राष्ट्रिय स्तरमा चिनाउन सहयोग पुग्ने विश्वास व्यक्त गर्नुभयो ।
बुद्धको जन्मभूमि लुम्बिनीको पहिचान बोकेको लुम्बिनी लायन्सलाई फाइनल खेलमा उत्कृष्ट प्रदर्शन र विजयका लागि यस अघिनै शुभकामना व्यक्त गर्नुभएको थियाे ।
