नेपालगन्ज, कार्तिक २ । चाडपर्वका समयमा हुन सक्ने रगतको अभावलाई मध्यनजर गर्दै बैजनाथ जेसीजले रक्तदान कार्यक्रम सम्पन्न गरेको छ। आइतबार बैजनाथ जेसीजको साप्ताहिक कार्यक्रमअन्तर्गत पहिलो दिन बाँकेको नेपालगन्जस्थित प्रादेशिक रक्तसञ्चार केन्द्रमा रक्तदान कार्यक्रम आयोजना गरिएको हो।
बैजनाथ जेसीजका अध्यक्ष गणेश खड्काको अध्यक्षतामा सम्पन्न कार्यक्रममा चाडपर्वका बेला अस्पतालमा उपचाररत बिरामीलाई आवश्यक पर्ने रगतको अभाव हुन नदिन सहयोग पुर्याउने उद्देश्य राखिएको थियो। दसैँ, तिहारलगायतका चाडपर्वमा अधिकांश मानिस आफ्नो घरपरिवारसँग रमाइरहेका बेला पनि मानव सेवाको भावनालाई प्राथमिकता दिँदै रक्तदान कार्यक्रम आयोजना गरिएको आयोजकले जनाएको छ।
रक्तदान जीवनदान भन्ने मूल भावनालाई आत्मसात् गर्दै कार्यक्रममा सहभागी रक्तदाताले रक्तदान गरेका थिए। रक्तदानजस्तो मानवीय कार्यले रगतको अभावमा रहेका बिरामीको उपचारमा सहयोग पुग्ने विश्वास आयोजकले व्यक्त गरेको छ।
कार्यक्रममा प्रमुख अतिथिका रूपमा राष्ट्रसेवक सहकारीका अध्यक्ष कृष्णकुमार थापा, विशिष्ट अतिथिका रूपमा प्रादेशिक रक्तसञ्चार केन्द्रका प्रमुख उपेन्द्र रेग्मी तथा अतिथिका रूपमा समाजसेवी डिलबहादुर थापालगायतको उपस्थिति रहेको थियो।
कार्यक्रममा सहभागी अतिथि तथा रक्तदाताले चाडपर्वका समयमा समेत सामाजिक उत्तरदायित्व निर्वाह गर्दै मानवीय सेवामा जुट्नु सकारात्मक र प्रशंसनीय कार्य भएको बताएका थिए।
बैजनाथ जेसीजले सामाजिक उत्तरदायित्वअन्तर्गत आयोजना गरेको यस कार्यक्रमले रक्तदानप्रति जनचेतना अभिवृद्धि गर्नुका साथै आवश्यकतामा परेका बिरामीलाई सहयोग पुग्ने अपेक्षा गरिएको छ। रगतको अभावका कारण कसैले पनि उपचारमा समस्या भोग्न नपरोस् भन्ने उद्देश्यले यस्ता मानवीय गतिविधि महत्त्वपूर्ण हुने आयोजक जनाएको छ।
कार्यक्रमको सञ्चालन बैजनाथ जेसीजका सचिव खगेन्द्र बुढाले गर्नुभएको थियो।
चाडपर्वको रमझमका बीच पनि मानव सेवाको भावनालाई प्राथमिकता दिँदै रक्तदान कार्यक्रममा सहभागी हुने सम्पूर्ण रक्तदाता, अतिथि, सहयोगी तथा उपस्थित महानुभावप्रति बैजनाथ जेसीज परिवारले हार्दिक धन्यवाद तथा आभार व्यक्त गरेको छ।
