नेपाल पत्रकार महासंघ बाँकेका २४२ मध्ये १७० सदस्यले गराए सदस्यता नवीकरण

नेपालगञ्ज,२६ बाँके। नेपाल पत्रकार महासंघ जिल्ला शाखा बाँकेमा आबद्ध २४२ जना साधारण सदस्यमध्ये १७० जनाले तीन वर्षको सदस्यता नवीकरण गराएका छन्।
नेपाल पत्रकार महासंघ बाँके शाखाले २०८३ असोज २१ गते ‘सदस्यता नवीकरण सूची’ सार्वजनिक गर्दै सदस्यता नवीकरण गराएका पत्रकारहरूको विवरण सार्वजनिक गरेको हो।
महासंघको विधान २०६० (पाँचौँ संशोधन २०७५) तथा नेपाल पत्रकार महासंघ बाँके शाखाको सदस्यता नवीकरणसम्बन्धी निर्णयअनुसार १७० जना साधारण सदस्यले विसं २०८१, २०८२ र २०८३ सालको आफ्नो सदस्यता नवीकरण गराएको सूचनामा उल्लेख छ।
शाखाले सार्वजनिक गरेको सूचीमा विभिन्न सञ्चारमाध्यममा आबद्ध पत्रकारहरूको नाम, सञ्चारमाध्यम, सदस्यता नवीकरणको विवरण तथा सम्पर्क नम्बर समावेश गरिएको छ। सूचीमा स्थानीय तथा राष्ट्रिय सञ्चारमाध्यममा कार्यरत पत्रकारहरू रहेका छन्।
महासंघ बाँके शाखाले सदस्यता नवीकरणसम्बन्धी विवरण सार्वजनिक गरेसँगै नवीकरण गराएका सदस्यहरूको अभिलेखसमेत अद्यावधिक भएको छ। सार्वजनिक सूचीले सदस्यता नवीकरणको अवस्था स्पष्ट पार्नुका साथै सम्बन्धित सदस्यलाई आफ्नो विवरण यकिन गर्न सहयोग पुग्ने अपेक्षा गरिएको छ।
नेपाल पत्रकार महासंघ बाँके शाखाको कार्यालय नेपालगञ्ज उपमहानगरपालिका–४, सञ्चारग्राम (बसपार्क) मा रहेको छ।